GAUTENG. – Die provinsiale departement van gesondheid sê bewerings dat daar ‘n ophoping van liggame by die Helen Joseph-hospitaal se lykshuis is, is ongegrond. Hy sê daar is tans sewe onopgeëiste liggame by die hospitaal. Die proses om naasbestaandes op te spoor en die nodige wetlike prosedures te volg, is steeds aan die gang.
Steve Mabona, woordvoerder vir die Gautengse gesondheidsdepartement, sê ‘n video wat op sosiale media versprei word, gee ‘n verkeerde beeld van die situasie by die hospitaal. Hy sê die lykshuis funksioneer normaal en daar is geen ophoping van liggame soos beweer word nie. Volgens Mabona kan die lykshuis 77 liggame akkommodeer, terwyl daar tans net 25 liggame is. Dit beteken daar is nog voldoende ruimte beskikbaar. Families haal ook steeds die liggame van hul geliefdes volgens die normale prosedures af.
Die departement vra die publiek om nie onbevestigde video’s of inligting op sosiale media te versprei nie, aangesien dit verkeerde inligting en onnodige kommer kan veroorsaak.
