GAUTENG. – ‘n Verdagte (44) is Dinsdag met ‘n komplete toegeruste en gemerkte gekloonde polisievoertuig in Walkerville in hegtenis geneem.
Kol. Noxolo Kweza sê die voertuig is tydens ‘n intelligensiegedrewe operasie by ‘n huis ontdek. Die polisie het op die volledig gekloonde polisiegemerkte Gauteng-hoofwegpatrollie Volkswagen Golf, ‘n wit VW Polo met blou ligte en sirene toegerus, ‘n gesteelde R5-geweer en ‘n polisieglimbaadjie, asook verskeie polisienommerplate beslag gelê.
“Die verdagte word moontlik met rooftogte in Gauteng verbind. Die polisie glo dat dié voertuie tydens vragmotorkapings en koeriervoertuigrooftogte gebruik is.”
Terwyl die ondersoek voortduur en nog inhegtenisnemings verwag word, sal die verdagte na verwagting binnekort in die hof verskyn.
