WES-KAAP. – Die George-munisipaliteit het met onmiddellike ingang vlak 3-noodwatertariewe ingestel nadat die Garden Route-dam se watervlak van 45,68% verlede week tot 44,50% hierdie week gedaal het. Die tariewe sal op die Januarie 2026-rekeningstaat weerspieël word.
Luidens ’n verklaring van die munisipaliteit volg die besluit op die afsluiting van ’n openbare deelnameproses op 19 Desember 2025 en ’n spesiale raadsbesluit wat op 4 Desember 2025 geneem is. Die verdere daling in damvlakke het die verskerping van waterbestuursmaatreëls van vlak 2C na vlak 2D genoodsaak, saam met die implementering van vlak 3-noodwatertariewe. Slegs 17 mm reën is die afgelope week aangeteken.
Onder vlak 2D word huishoudings tot 10 kiloliter water per maand beperk, met verbruik bo dié drumpel wat teen noodtariewe gehef sal word. Sakepersele, vermaaklikheidsplekke en nywerhede moet hul waterverbruik verminder, terwyl hoëverbruikers gemonitor kan word en vloei-beperkende toestelle geïnstalleer kan word waar nie-nakoming voorkom.
Godfrey Louw, die waarnemende munisipale bestuurder, sê:: “Hierdie maatreëls is nie strafgerig nie, maar noodsaaklik. Elke vrystelling wat toegestaan word, verminder die water wat môre beskikbaar is.” Die munisipaliteit sê verdere kommunikasie sal volg indien damvlakke verder daal.
Die munisipaliteit maak voorsiening vir vrystellings in gevalle waar kritieke gesondheids- en veiligheidsbehoeftes ter sprake is. Volle of gedeeltelike vrystellings kan ook oorweeg word vir persele wat noodsaaklike dienste lewer. Aansoekvorms vir vrystellings is aanlyn beskikbaar.
• English: https://www.george.gov.za/…/Exemption-Application-Form…
• Afrikaans: https://www.george.gov.za/…/Exemption-Application-Form…
• IsiXhosa: https://www.george.gov.za/…/Exemption-Application-Form…
