WES-KAAP. – As deel van voortdurende landelike veiligheidsinisiatiewe het die Garden Route-distrikspolisie Vrydag saam met Cape Nature ’n gesimuleerde oefening oor bedreigde spesies by die Riversdal-skouterrein aangebied. Die doel was om beskikbare hulpbronne te toets om die onwettige handel in en smokkelary van bedreigde spesies te bekamp.
Sers. Christopher Spies, polisiewoordvoerder, sê in ‘n verklaring die oefening is deur 18 SAPD- landelike distriksveiligheidskoördineerders, landelike veiligheidsforums, die Wes-Kaapse provinsiale verkeersafdeling, Hessequa- munisipale verkeer-en-wetstoepassing, asook sleutelrolspelers uit die boerderygemeenskap bygewoon. Ondersoekers van die veediefstal- en bedreigde spesie-eenhede in Worcester, Beaufort-Wes en Oudtshoorn het ook deelgeneem.
Brig. Zukiswa Matumbu, Wes-Kaapse provinsiale hoof vir proaktiewe polisiëring, het die geïntegreerde samewerking geloof en die belangrikheid van volgehoue vennootskappe beklemtoon.
