GAUTENG. – Amoidahh Manamela, ’n advokaat, is Maandag deur Lyttelton-speurders in verband met verskeie beskuldigings van diefstal en bedrog vasgetrek.
Kapt. Johan van Dyk, polisiewoordvoerder, sê aan Nuusflits Manamela het glo vir persoonlike finansiële gewin verskeie dokumente vervals en kliënte mislei. “Die beskuldigde het vir ’n geruime tyd inhegtenisneming ontduik, maar speurders kon haar ná deeglike en gesamentlike ondersoekwerk opspoor en in hegtenis neem.”
Manamela het Maandag in die Pretoria-Sentraal-landdroshof verskyn. Die saak is vir formele borgtogaansoek en verdere ondersoek tot 8 Desember uitgestel.
Die polisie doen ’n beroep op enige persone wat moontlik slagoffers van die advokaat was, om lt.kol. Mathole by 082 715 9583 of 071 675 6421 te bel.
