OOS-KAAP. – ‘n Man (50) wat weens verskeie beweerde misdade deur die polisie gesoek is, is Dinsdag in Msobomvu tydens ‘n oor-en-weer-skietery deur die polisie doodgeskiet.
Lt. kol. Siphokazi Mawisa sê lede van Butterworth-misdaadintelligensie het die oggend omstreeks 11:50 inligting opgevolg oor die verdagte wat glo met veelvuldige sake, soos moord, huisroof en gewapende roof, verbind is.
Die verdagte is opgemerk waar hy ‘n taxi van Msobomvu na Bika geneem het, waarna speurders en sigbare polisiëring by die misdaadintelligensie-lede aangesluit het. Die taxi is tot in die Cuba-woonbuurt in Butterworth gevolg en takties genader toe passasiers uitklim. Die verdagte het met ‘n pistool uit die taxi gespring en op die polisielede geskiet, waarop die polisie teruggeskiet het en die verdagte noodlottig gewond het.
‘n 9 mm-pistool is gekonfiskeer.
