VRYSTAAT. – Drie mans en ‘n vrou is Vrydag omstreeks 15:30 vir beweerde betrokkenheid by motordiefstal in Vereeniging gearresteer. Tydens die arrestasie is ‘n seinblokkeerder en ‘n gesteelde Porsche Cayenne se sleutel ontdek.
Sers. Josephine Rani sê verskeie polisie-eenhede het inligting om vir verdagtes in ‘n silwerkleurige Mercedes-Benz op die uitkyk te wees, ontvang en opgevolg. Die Mercedes is op die R59 in die rigting van Parys opgemerk, gestop en deursoek. Lede het ‘n seinblokkeerder en ‘n beweerde gesteelde Porsche-sleutel in die voertuig aangetref.
Polisielede het later die aand die Porsche Cayenne, wat na bewering gesteel is, in die Blyde, Pretoria, teruggekry.
Rani sê die verdagtes sal na verwagting binnekort op aanklag van die besit van ‘n seinblokkeerder in die Parys-landdroshof voorkom.
