NOORDKAAP. – Die John Taolo Gaetsewe-hoofwegpatrollie het Sondag ‘n motor wat volgens vermoede in Postmasburg gesteel is, teruggevind. Die Mazda 323 was deur ‘n silwerkleurige Colt-bakkie gesleep.
Brig. Mashay Gamieldien sê die motor is omstreeks 09:30 gesteel. Vier uur later is ‘n wenk ontvang van die motor wat ongeveer 100 km van Kuruman, naby Komtieke, onderweg na Vryburg gewaar is. Die polisielede het eerste die Colt-bakkie opgemerk waar dit sonder ‘n insittende langs die pad staan. Die Mazda is verlate op die N14 opgemerk.
Kort daarna het polisiebeamptes gehoor twee mans loop met ‘n plastiekhouer in die rigting van Komtiekie. Terwyl Vryburg se honde-eenheid die gesteelde voertuig oppas, het die hoofwegpatrolliebeamptes op ‘n verdere wenk van drie mans by die bakkie, van wie twee met die beskrywing van die lopende mans met die kan ooreenstem, gereageer.
Die drie verdagtes is op vermoede van diefstal van ‘n motorvoertuig gearresteer.
