GAUTENG. – Deenadayalan Govender sal Maandag 31 Augustus in die openbaar voor die kommissie van ondersoek na kriminaliteit, politieke inmenging en korrupsie in die strafregstelsel getuig.
Govender se aansoek om sekere dele van sy getuienis agter geslote deure af te lê, is Sondag deur die kommissie gedeeltelik van die hand gewys. Die aansoek het betrekking gehad op sy reaksie op paragrawe 2.4 en 2.5 van die kommissie se regulasie 10(6)-kennisgewing van 7 Augustus 2026. Die kommissie het beslis dat Govender oor dié aangeleenthede tydens ’n openbare sitting op Maandag om 09:30 moet getuig. Sekere beperkings is egter ingestel. Govender hoef nie die identiteit van getuies bekend te maak wat verband hou met die voortslepende ondersoek na die diefstal van vermoedelike kokaïen by die kantore van die direktoraat vir prioriteitsmisdaadondersoek (Valke) in Port Shepstone nie.
’n Gedeelte van Govender se getuienis wat verband hou met die getuienis wat Getuie P agter geslote deure gelewer het oor ’n teenintelligensie-operasie rakende georganiseerde dwelmbendes in die Durban-gebied, sal ook agter geslote deure aangehoor word. Dié gedeelte kan op 31 Augustus of op ’n ander datum wat deur die kommissie bepaal word, aangehoor word.
Die berig is gebaseer op die kommissie se beslissing gedateer 30 Augustus 2026. Getuies se identiteit en spesifieke polisie-ondersoekmetodes word ingevolge die beslissing beskerm.
Die kommissie se beslissing verwys na die voortslepende ondersoek na die diefstal van vermoedelike kokaïen by die Valke se kantore in Port Shepstone. Volgens ’n berig deur SA Government News van November 2021 is 541 kg kokaïen, met ’n straatwaarde van sowat R200 miljoen uit ’n kluis by die Valke se kantore vir ernstige georganiseerde misdaad gesteel. Die Valke het destyds ’n ondersoek na die voorval gelas, terwyl ’n strafregtelike ondersoek na die diefstal van stapel gestuur is.
Lees meer hier onder:
