MPUMALANGA. – Gewapende rowers het Saterdagoggend omstreeks 00:45 tydens ‘n naggebedsessie ‘n kerk in Numbi bestorm. ‘n Saak van sakeroof is deur die Masoyi-polisie oopgemaak vir ‘n voertuig en elektronika wat na bewering gedurende die voorval gesteel is.
Lt.kol. Jabu Ndubane, polisiewoordvoerder, sê in ‘n verklaring aan Nuusflits gemeentelede was besig om te bid toe vyf vermomde mans met pistole die kerk binnegegaan en hulle beroof het. 11 selfone, twee klankversterkers en die pastoor se voertuigsleutels is gesteel. Die gesteelde items is in ’n wit Audi Q3 SUV met registrasienommer KFM 302 MP gelaai, waarmee die verdagtes van die toneel gevlug het. Die voertuig is nog nie teruggevind nie, maar word met behulp van Cartrack nagespoor.
Geen skote is afgevuur nie, niemand is beseer nie en geen arrestasies is tot dusver gemaak nie.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
