MPUMALANGA. – Difference Fankomo (35), ‘n aktiewe lid van die Gemeenskapspolisiëringsforum (GPF), is Maandagaand in ‘n mesaanval dood. Twee ander GPF-lede het ernstige steekwonde in die voorval opgedoen. ‘n 17-jarige verdagte is Dinsdag in verband met die aanval in hegtenis geneem.
Kol. Donald Mdhluli, polisiewoordvoerder, het bevestig dat die insident omstreeks 21:00 plaasgevind het. Fankomo se liggaam is op die toneel gevind, terwyl twee gewonde GPF-lede in die omgewing aangetref is. Die verdagte het van die toneel gevlug, maar is die volgende dag deur die gemeenskap vasgetrek en aan die polisie oorhandig. Die polisie het beslag gelê op ‘n mes wat vermoedelik in die aanval gebruik is.
Volgens Mdhluli was die beweerde motief vir die aanval ‘n selfoon. Die twee beseerde lede is aanvanklik na ‘n kliniek vir noodbehandeling geneem en daarna na ‘n hospitaal vir verdere sorg oorgeplaas.
Mdhluli het ook aangedui dat die ondersoek na die verdagte se moontlike betrokkenheid by ‘n ander moord in Augustus 2023 aan die gang is. Dié moord het betrekking op ‘n man van 50 wat in 2023 in dieselfde gebied doodgesteek is.
Mdhluli sê omdat die verdagte minderjarig is, word daar saam met proefbeamtes gewerk.
‘n Saak van moord en twee sake van poging tot moord word ondersoek. Die verdagte sal na verwagting binnekort in die hof verskyn. Die ondersoek duur voort.
