UPINGTON, NOORD-KAAP. – ’n Man is Woensdagmiddag noodlottig in ’n kop-aan-kop-botsing op die N14 buite Upington beseer. Nooddienste is om 15:30 na die ongelukstoneel, op die Olifantshoek-pad uit, ontbied.
Met hulle aankoms op die toneel het hulle ’n trok en die wrak van ’n wit Toyota Fortuner aangetref. Volgens sers. Omphile Masegela is die bestuurder van die Toyota Fortuner op die toneel dood verklaar.
Beeldmateriaal wat op sosiale media versprei word, wys die trokdrywer se kamera wat die ongeluk afgeneem het. Na bewering het die Fortuner te wyd om ’n draai gegaan en in die regterbaan voor die aankomende trok beland. ’n Formele ondersoek sal egter die amptelike oorsaak van die ongeluk bepaal. Die trokdrywer is lig beseer.
Bronne: Gemsbok, SA Truk King, Kalahari Momentum Digital
