Herwinningsoperasies duur voort ná 9 sterf toe gebou in duie stort

GAUTENG. – Nege mense het gesterf toe ‘n gebou Maandag by Amethyst Business Park in Ormonde in duie gestort het. Die Stad Johannesburg se nooddienste bevestig herwinningsoperasies duur voort, nadat drie mense wat gisteraand nog vermis was, opgespoor is.

Volgens Xolile Khumalo, woordvoerder vir die nooddienste, sê reddingsdienste sal ‘n omvattende soektog op die terrein uitvoer om te verseker dat niemand agterbly nie. Tot dusver is nege liggame gevind en drie oorlewende bouwerkers wat krities beseer is, is gisteraand hospitaal toe vervoer.

Khumalo bevestig in ‘n verklaring die gebou is teenstrydig met verordeninge opgerig. Daar is geen rekord van goedkeuring deur munisipale owerhede nie en die bouplanne is nooit formeel ingedien of gesanksioneer nie. Vereiste permitte is nie bekom nie en verpligte inspeksies is nie gedoen nie. Die gebou voldoen dus nie aan stedelike beplanning- en boustandaarde nie en word as ’n onwettige ontwikkeling beskou. Khumalo sê die Stad doen ’n beroep op alle konstruksiemaatskappye om streng te voldoen aan alle vereistes en regulasies by elke bouprojek om sulke tragedies te voorkom en die publiek se veiligheid te beskerm.

Die Stad Johannesburg-nooddienste spreek meegevoel uit teenoor al die families wat deur hierdie tragiese voorval geraak is. Die terrein sal vir verdere ondersoek aan die polisie oorhandig word.

Dada Morero, die uitvoerende burgemeester van die Stad Johannesburg, het vanoggend (Dinsdag) saam met lede van die burgemeesterskomitee die terrein besoek waar die gebou in duie gestort het. Khathutshelo Mulaudzi, waarnemende burgemeesterswoordvoerder, sê die Stad staan by almal wat deur hierdie hartverskeurende verlies geraak is.

Morero en die stadsleiers bied hul innige meegevoel aan die familie, vriende en geliefdes van die oorledenes. Daar word voortgegaan om saam met alle owerhede te werk om die oorsaak van die instorting vas te stel en om ondersteuning aan elke geraakte gesin te verseker.