Huldeblyke stroom in na die nuus van aktrise en regisseur, Julie Strijdom (79), se afsterwe op Saterdag 16 Maart. Sy is na ’n kort siekbed weens nierversaking oorlede.
Strijdom was te sien as tannie Breggie in die reeks Binnelanders en is gereeld op RSG se radiodramas gehoor. Sy was ook al regisseur by die SAUK.
Magriet van Loggerenberg, televisievervaardiger, het die nuus op haar Facebook-blad bekend gemaak. “Ons het hartseer nuus. Julie Strijdom is sopas oorlede na ’n siekbed. Ons is dankbaar dat sy nie gely het nie. Ons sal binnekort meer inligting gee oor die gedenkdiens.”
Een vriendin onthou die vrolike kuiers rondom haar eetkamertafel in Menlopark. ’n Oudkollega beskryf haar as ’n wonderlike kollega en vriendin wat altyd bereid was om iets nuut te probeer.
Bronne: Pretoria FM, Facebook
