MIDDE-OOSTE. – Israel het ingestem tot onderhandelinge met Libanon, terwyl sy voortgesette lugaanvalle ’n brose skietstilstand tussen die VSA en Iran in gevaar stel.
Volgens BPS News sal Amerikaanse en Iranse diplomate na verwagting die naweek in Pakistan vergader, maar ’n groot gebrek aan vertroue en onsekerheid oor die proses bedreig enige moontlike einde aan meer as vyf weke se gevegte.
Gister het Israeliese vegvliegtuie in net meer as 10 minute 100 aanvalle uitgevoer, waarin meer as 300 mense dood is en meer as 1 000 beseer is – een van die bloedigste dae in Libanon se onlangse geskiedenis. Israel het gesê die teikens was lede van Hezbollah. Die aanvalle het egter digbevolkte woongebiede getref en ’n swaar tol onder burgerlikes geëis.
Die Amerikaanse president, Donald Trump, het Israel intussen aangemoedig om sy aanvalle op Libanon te verminder. Vandag het Israel se eerste minister, Benjamin Netanyahu, tot direkte onderhandelinge ingestem.
Trump het gister aan NBC News gesê hy is “baie optimisties” oor die vooruitsigte vir ’n langtermyn-ooreenkoms met Iran en dat dié land se onderhandelaars in privaat gesprekke “meer redelik” is as in hul openbare verklarings.
Bronne: BPS News, NBC News
