Die nasionale verbruikerskommissie (NVK) het aangekondig dat Jaguar E-PACE-modelle van 2020 tot 2024 herroep word weens ’n probleem met die passasiers-lugkussing.
Jaguar Land Rover Limited sê aan die NVK die betrokke lugkussing kan tydens ontplooiing skeur as gevolg van ‘n foutiewe vou tydens samestelling. ’n Geskeurde lugkussing verminder beskerming en verhoog die risiko van beserings tydens ’n botsing en kan ook warm gasse laat ontsnap wat brandwonde kan veroorsaak.
Verbruikers wat geraak word, word aangeraai om onmiddellik hul naaste gemagtigde Jaguar-handelaar te kontak vir gratis vervanging van die betrokke module en komponente.
Die NVK sal voortgaan alle herroepaksies te monitor.
