Die Stad Kaapstad se Direktoraat vir Stedelike Mobiliteit het bevestig dat hulle voortgaan met verskeie maatreëls om die impak van gevaarlike bestuur en onbeheerste voertuie in Kloofnekweg te verminder.
LEES OOK: Drie mense dood en verskeie beseer toe weerlig tempelkompleks tref
Een van die jongste ingrypings sluit in ‘n haalbaarheidstudie oor die moontlike aanwending van nood-afloopstroke vir vragmotors met remprobleme, wat op strategiese punte langs die pad geplaas word. Intussen is daar oor die afgelope paar maande 18 nuwe “Bly in Lae Rat”-waarskuwingstekens aangebring om veral vragmotorbestuurders te waarsku oor die pad se steil afdraandes.
“Kloofnekweg is geklassifiseer as ‘n klas 2-hoofaansluitingsroete, wat beteken dit dra hoë verkeersvolumes en kan nie beperk word vir swaar voertuie nie,” het raadslid Rob Quintas, burgemeesterskomiteelid vir stedelike mobiliteit, verduidelik. “Daar is min alternatiewe toegangspaaie tussen die middestad en die Kampsbaai-omgewing en selfs busse gebruik hierdie roete daagliks.”
Die nuwe waarskuwingstekens is die jongste toevoeging tot bestaande maatreëls wat reeds oor die afgelope paar jaar geïmplementeer is, insluitend:
- Die verlaging van die spoedgrens van 60 km/h na 50 km/h;
- Die opgradering van padtekens om die nuwe spoedgrens aan te dui, insluitend ‘n waarskuwingsflitslig in Kampsbaai-rylaan;
- Die herstel en herkalibrasie van die spoedkamera in Kloofnekweg;
- Die installering van ‘n nuwe verkeerslig vir voetgangers by die kruising van Tafelbergweg en Seinheuwelweg, wat nie net voetgangerveiligheid verbeter nie, maar ook verkeersvloei help verlig vir voertuie wat van Tafelbergweg af wil inkom.
Hoewel daar voorstelle was vir die aanbring van spoedhobbels, meen die Stad dat dit nie prakties is op ’n pad met ’n helling van tot 14% nie. “Spoedhobbels op sulke hellings kan maklik ‘n katapulteer-effek skep vir bestuurders wat nie betyds spoed verminder nie,” sê Quintas.
’n Onlangse ondersoek het bevind dat die gemiddelde spoed vir swaar voertuie 51 km/h noordwaarts (afdraand) en 47 km/h suidwaarts is. Ligte voertuie beweeg gemiddeld teen 57 km/h noordwaarts en 56 km/h suidwaarts. Hoewel die meeste bestuurders binne die spoedgrens bly, is daar geïsoleerde gevalle van spoedoortredings.
“Dit bly elke motoris se verantwoordelikheid om hul spoed dop te hou en te verseker dat hul voertuig padwaardig is. Deur die tekens te respekteer en versigtig te bestuur, dra elkeen by tot veiliger paaie vir almal,” het Quintas afgesluit.
