OOS-KAAP. – ‘n Beweerde kaper is Saterdag deur die polisie in New Brighton doodgeskiet. Nog twee verdagtes in die gekaapte voertuig is gearresteer.
Lt.kol. Siphokazi Mawisa sê na bewering het twee gewapende verdagtes omstreeks 20:30 ‘n stilstaande silwerkleurige Opel Corsa in Ntshekisastraat gekaap. Die gekaapte individu is ongeskaad. ‘n Saak is by die polisie aangegee en die motor is op alle polisieradiostelsels gesirkuleer.
Die voertuig is omstreeks 23:45 met drie insittendes in Kwazastraat opgemerk en vasgekeer. Dit is takties deur ‘n polisiebeampte genader, waarna een van die verdagtes glo ‘n vuurwapen op hom gerig het. Die verdagte is deur die polisiebeampte doodgeskiet en die twee ander verdagtes is gearresteer. ‘n Ongelisensieerde vuurwapen en ammunisie, sowel as die voertuig, is vir verdere ondersoek gekonfiskeer.
‘n Saak van die besit van vermoedelik gesteelde eiendom met ‘n addisionele klagte van besit van ‘n ongelisensieerde vuurwapen en ammunisie word ondersoek.
‘n Geregtelike doodsondersoek wat geopen is, word deur Opod, die polisiewaghond, ondersoek.
