VRYSTAAT. – Vier kinders is met brandwonde vir mediese behandeling na hospitale geneem toe ‘n houer met bensien ontplof het toe ‘n tienermeisie dit glo in ‘n vuur gegooi het.
Adj.off. Mmako Mophiring sê die polisie het ‘n navraagdossier geopen wat ondersoek word. Na bewering het die tienermeisie op ‘n vuur buite ‘n huis in Ha-Rankopane-woonbuurt in Qwaqwa kos gemaak en gesukkel om die vuur met nat hout aan die gang te kry. Sy het daarop glo ‘n plastiekhouer, wat sy gedink het paraffien bevat, in die huis gaan haal en in die vuur gegooi. Die houer het ontplof en vier kinders van bure, wat om die vuur gesit het, het gebrand.
Hulle is vir mediese hulp na hospitale geneem. Die tienermeisie is nie beseer nie.
