LIMPOPO. – Katlego Machaba (2) en Koketso Kekana (2) het Vrydag gesterf nadat hulle en nog drie kinders tussen een en vyf jaar oud buite gespeel en die blare van ‘n Cascabela Thevetia geëet het.
Kgabo Senyatsi, woordvoerder vir die Capricorn-distriksmunisipaliteit, sê in ‘n verklaring die kinders het “Malapana” gespeel. Twee van die kleuters het siek gevoel en het opgegooi, gesweet en loopmaag gehad. Een is na die Mokgoto-kliniek geneem en is dood verklaar. Die tweede kleuter is na Zebediela-hospitaal geneem en het daar gesterf. Die drie ander kinders is vir waarneming na Zebediela-hospitaal geneem, maar is sedertdien ontslaan.
Geeloleander (Cascabela Thevetia) is inheems aan tropiese en subtropiese streke en dra heeljaar ‘n heldergeel blom. Die blare van die boom is giftig en dodelik.
Rdl. Mamedupi Teffo, die uitvoerende burgemeester, het medelye met die families van die oorlede kinders betuig.
