OOS-KAAP. – Sewe mense het hul lewens verloor in ’n kop-aan-kop-botsing tussen ’n motor en ’n vragmotor op die M17 tussen KwaZakhele en Motherwell in Gqeberha. Die oorsaak van die botsing word ondersoek en ’n saak van strafbare manslag is aanhangig gemaak.
Xolile Nqatha, die Oos-Kaapse LUR vir vervoer, sê ’n Renault Triber met sewe insittendes en ’n swaar vragmotor het Sondagmiddag in teenoorgestelde rigtings gery en reg van voor met mekaar gebots. Die motor was onderweg na Motherwell, terwyl die vragmotor na KwaZakhele gery het. Al sewe insittendes van die motor is op die toneel dood verklaar. Die vragmotorbestuurder het oorleef en is vir skok behandel.
Nooddienste was op die toneel. Die pad is gedeeltelik gesluit, met motoriste wat aangeraai is om versigtig te wees. Nqatha het sy meegevoel met die families uitgespreek en weer ’n beroep op padgebruikers gedoen om verantwoordelik te bestuur en die padreëls te gehoorsaam.
