KALKBAAI, WES-KAAP. – ’n Brand het Maandag in Kalkbaai ten minste een huis in puin gelê. Nog ’n huis is beskadig. Gevolglik moes Boyesweg, Old Boyesweg, Kalkbaai se hoofstraat en Clairvauxweg vir verkeer gesluit word.
Volgens Jermaine Carelse, woordvoerder van die stad Kaapstad se brand-en-reddingsdienste, was die inwoners van die afgebrande huis nie tuis tydens die insident nie. Geen ander inwoners is ontruim nie.
Die brande is deur droë en warm toestande bevorder. Teen 20:00 gisteraand was die meeste brande volgens Carelse onder beheer gebring, maar brandbestryders het deurnag gewerk om die situasie te kontroleer en onder beheer te hou.
Verskeie reddingspanne waaronder dié van Tafelberg Nasionale Park het met die brandbestrydingspogings gehelp. Helikopters is ook ingespan.
Weerstoestande vir die ontstaan van wegholveldbrande word weer vir vandag vir die Wes-Kaap voorspel.
Inwoners het die volgende beeldmateriaal op sosiale media gedeel:
Bronne: Die Stad Kaapstad, Table Mountain National Park, Twitter
