GAUTENG. – Die departement van korrektiewe dienste (DKD) het beslag gelê op selfone, dwelms en verskeie ander verbode items tydens ’n dringende deursoeking by die Kgosi Mampuru II-korrektiewe sentrum in Pretoria. Die optrede volg nadat ’n video op sosiale media versprei is waarin gevangenes gesien kan word waar hulle in die sentrum dans en musiek speel.
Singabakho Nxumalo, DKD-woordvoerder, sê Makgothi Samuel Thobakgale, DKD- nasionale kommissaris, het onmiddellik opdrag gegee dat die eenheid waar die betrokke gevangenes gehuisves word, deursoek word. Volgens die departement is vyf selfone, drie roeteerders, ’n skootrekenaar, twee bankkaarte, 11 laaiers, drie USB-toestelle, 16 pakkies onwettige sigarette, vyf bolletjies dagga, 194 Mandrax-tablette, twee ystersae en verskeie skerp voorwerpe in beslag geneem.
Interne dissiplinêre stappe staar gevangenes wat met die verbode items verbind word, asook dié wat in die video geïdentifiseer is, in die gesig. Hulle gedrag kan ook hul korrektiewe plasing en voorregte beïnvloed. Die departement ondersoek verder hoe die selfoon waarmee die video opgeneem is, en ander verbode items by die sentrum ingesmokkel is. Enige moontlike betrokkenheid of nalatigheid deur personeel sal ook ondersoek word.
Thobakgale het beklemtoon dat geen gevangene of amptenaar toegelaat sal word om die dissipline en veiligheid van korrektiewe sentrums te ondermyn nie.
