WES-KAAP. – ‘n Finse egpaar, wat besig is om om Suid-Afrika te seil, het Dinsdagoggend met hulle seiljag op Santosstrand in Mosselbaai beland. Die seiljag is later die oggend Mosselbaai-hawe ingesleep.
Andrén Fraser van die NSRI sê ‘n reddingsvaartuig en -swemmers, asook ander rolspelers, is dadelik afsonderlik na die strand ontplooi, waarna die swemmers aan boord van die seiljag gegaan het. ‘n Opblaasboot van die Skippers Foundation van Mosselbaai het ‘n tou van die reddingstuig na die seiljag geneem.
“Met die tye van die seedeinings wat in die uitgaande gety aan wal gespoel het en met behulp van ons reddingstuig is die seiljag, wat aanvanklik langs die strand gelê het, getrek en gedraai om na die see te wys, waarna daar gepoog is om dit sagkens in die vlak water van die strand af te trek, maar pogings was nie suksesvol nie.”
Nadat die TNPA-hawesleepboot, Arctic Tern, aangesluit het, is die sleeptou na hulle oorgeplaas, waarna die jag suksesvol die see ingesleep is en daarna na die Mosselbaai-hawe. Die operasie is omstreeks 11:15 sonder enige voorvalle afgehandel.
