NOORD-KAAP. – ‘n Konstabel, verbonde aan Mothibistad-polisiestasie is gedurende die naweek vir beweerde dronkbestuur met ‘n staatsvoertuig in hegtenis geneem.
Brig. Mashay Gamieldien sê die konstabel was aan diens. Aanklagte teen die konstabel is dronkbestuur, roekelose en nalatige bestuur, asook die gebruik van ‘n staatsvoertuig sonder die eienaar se toestemming. Die lid het reeds op die aanklagte in die Mothibistad-landdroshof verskyn en is op borg vrygelaat.
Lt.genl. Otola, die provinsiale kommissaris in die provinsie, het die insident veroordeel en gesê departementele prosesse in lyn met SAPS 2016 dissiplinêre regulasies is onderweg.
“Polisiebeamptes is bedoel om deur voorbeeld te lei. Ons verwag nie die gedrag wat op ‘n video uitgebeeld is van enige van ons lede nie. Ons sal verseker dat ‘n deeglike interne proses na die gedrag van hierdie polisiebeampte uitgevoer word. Ons kondoneer nie en sal nie sulke gedrag in ons geledere toelaat nie,” het genl. Otola gesê.
In die video hier bo kan gesien word die konstabel is in volle uniform.
