KWAZULU-NATAL. – ‘n Motorfietsryer, vermoedelik in sy 30’s, is ernstig beseer toe hy vanoggend net na 06:30 op die hoek van St. Johnsrylaan en Paynestraat in Pinetown in ‘n ongeluk was.
Garrith Jamieson van ALS Paramedics sê die diens is na ‘n ernstige motorfietsongeluk by die adres.
“Met aankoms was paramedici geskok om die Superbike nog bo-op die voertuig te vind. Paramedici het die motorfietsryer ‘n paar meter verder aangetref.”
Die beseerde motorfietsryer is deur gevorderde lewensondersteunende paramedici gestabiliseer voordat hy vir verdere mediese sorg na ‘n nabygeleë hospitaal vervoer is.
“In hierdie stadium is die gebeure wat tot die ongeluk gelei het onbekend, maar die SAPD en metropolisie was teenwoordig en sal verder ondersoek instel.”
