KWAZULU-NATAL. – Lt.genl. Nhlanhla Mkhwanazi het ‘n onmiddellike ondersoek beveel nadat beeldmateriaal aan die lig gekom het van ‘n polisielid in volle uniform wat ‘n lid van die publiek in die openbaar aanrand.
This happened in Durban…@SAPoliceService pic.twitter.com/daKFlr6mYQ
— Yusuf Abramjee (@Abramjee) November 12, 2024
Kol. Robert Netshiunda sê Mkhwanazi het beveel dissiplinêre stappe moet saam met ‘n ondersoek geneem word. Die video is by die Punt, Durban, geneem. Terwyl die polisielid die man aanrand en ‘n kollega hom probeer kalmeer, kom die man nie as ‘n bedreiging voor nie.
Mkhwanazi sê indien die man ‘n misdaad gepleeg het, moes hy aangehou of gearresteer gewees het en nie aangerand nie. “Die daad van aanranding van ‘n ander persoon is ‘n kriminele oortreding en die polisiebeampte wat in die video gesien is waar hy ‘n burgerlike aanrand, moet die gevolge dra. Ons kan nie ‘n situasie toelaat waar hardwerkende polisiebeamptes se beeld omgekeer word deur onprofessionele optrede van sekere individue binne ons geledere nie. Wanneer ons misdaad bekamp, begin ons van binne af en as sodanig, sal die beampte wat die beeld van die polisie skade aangedoen het in ooreenstemming met die SAPD se Gedragskode, Regulasies en die Grondwet tot verantwoording gebring word.”
Netshiunda sê polisiebeamptes dien die publiek en moet hulle kliënte met respek behandel. “Lede van die publiek word aangemoedig om enige magsmisbruik deur die polisie aan te meld sodat onprofessionele gedrag aangespreek en reggestel kan word.”
