OOS-KAAP. – Paaie was van gister af vir verkeer gesluit en vanoggend was die Penhoekpas op die N6 en die Barklypas op die R58 steeds vir verkeer gesluit. Die padoppervlak is weens die sneeu glad en voertuie het vasgesit.
Die departement van vervoer sê provinsiale verkeersowerhede is hard aan die werk om te verseker motoriste kom veilig by hulle bestemming aan ondanks die sneeu en moeilike bestuursomstandighede.
Vanoggend na 08:00 was ligte diensvoertuie, minibusse en klein voertuie op die Penhoekpas toegelaat, maar busse en vragmotors is deur verkeersbeamptes veilig deur die pas begelei. Net na 11:00 is die R58-pad tussen Lady Grey en Elliot gedeeltelik vir ligte voertuie oopgemaak.
Motoriste is gemaan om waaksaam en versigtig te bestuur.
“Neem asseblief kennis dat weerstoestande mistig is, met geen reën wat aangemeld is nie, maar die padoppervlak is glad, dus word versigtigheid vir alle bestuurders aangeraai.”
Vir hulp kan motoriste 0800 644 644 bel.
