Video-opnames in die berig wys die bemanning in die ruimte en Benthaus, die rolstoelgebruiker, ná die landing.
INTERNASIONAAL. – Michaela (Michi) Benthaus (33) het Saterdag 20 Desember 2025 geskiedenis gemaak toe sy as die eerste rolstoelgebruiker die ruimte ingegaan het. Sy was aan boord van Jeff Bezos se Blue Origin, New Shepard-ruimtetuig, wat vir ‘n negende vlug vanjaar vanaf Texas gelanseer is.
Benthaus, ’n Duitse lugvaart- en megatronika-ingenieur, het sewe jaar gelede tydens ‘n bergfietsongeluk ’n rugmurgbesering opgedoen. Die suborbitale vlug het haar na meer as 105 km bo die aarde geneem voordat die kapsule veilig in Wes-Texas geland het.
Sy het ná haar terugkeer gesê: “Jy moet nooit jou drome opgee nie.” Die vlug is deel van Blue Origin se kommersiële ruimteprogram en is uitgevoer met aanpassings om Benthaus se deelname moontlik te maak. Sending NS-37 was die 37ste bemande vlug. Die bemanning het bestaan uit Benthaus, Joey Hyde, Hans Koenigsmann, Neal Milch, Adonis Pouroulis en Jason Stansell. Volgens Blue Origin was dit die eerste keer dat ’n rolstoelgebruiker bo die Kármán-lyn, die internasionaal erkende grens van die ruimte, gevlieg het. Phil Joyce, senior visepresident van New Shepard, het gesê die sending toon dat ruimtevlug vir ’n wyer en meer diverse groep mense toeganklik is.
Druk hier om meer te lees.
Bronne: Blue Origin, AP News / ABC News, Weather.com, GeekWire, Houston Chronicle, Fox News, CNN, Space for Humanity, National Space Society,
