Verskeie foto’s en video’s in berig.
KWAZULU-NATAL. – ‘n Vierverdieping tempel-konstruksie in Redcliffe, naby Verulam het Vrydag ineengestort. Rusa sê stemboodskappe vir hulp is deur vasgekeerdes vanuit die puin gestuur. Die soektog is Vrydagaand gestop, maar vanoggend voortgesit.
Reaction Unit South Africa (Rusa) sê daar word sedert 05:00 vanoggend (Saterdag) na oorlewendes in die puin gesoek. Vyf vasgekeerdes kon gered word. Volgens dié diens het agt persone aanvanklik matige tot ernstige beserings opgedoen toe hulle deur die vallende puin getref is. Met die gebou wat onstabiel is, is die soektog na oorlewendes tot vanoggend uitgestel.
Die struktuur het volgens Rusa glo meegegee terwyl klaar gemengde sement gebruik is. Die kontrakteur was glo nie ten tyde van die voorval op die terrein nie, daarom is dit onseker hoeveel persone beseer is. Verskeie dienste is op die toneel teenwoordig en werk saam.
KZN VIP Protection Services sê beseerde persone is saam met Rusa na hospitale vervoer.
Tydens ‘n onverwante voorval het ‘n 64-jarige persoon wat die rampgebied besoek het, aan ‘n hartaanval gesterf.
IPSS Medical Rescue het foto’s gedeel om te wys hoe moeilik dit is om in die puin by oorlewendes uit te kom.
