MPUMALANGA. – ‘n Skedel, ‘n lyf los daarvan en ‘n regterarm sonder ‘n hand is Dinsdag omstreeks 16:30 naby ‘n rivier in Elukwatini ontdek. Die Elukwatini-polisie is op soek na die oorledene se naasbestaandes.
Lt. kol. Jabu Ndubane sê ‘n herder (umalusi) het op die oorskot in Tjakastad (kaMalahleka) afgekom. Die hoofman (induna) in die area is ingelig en hy het die polisie ontbied. Beide die bene en die linkerarm van die liggaam is vermis. Die polisie vra enigiemand met relevante inligting om die oorledene te kan identifiseer of wat weet wat gebeur het, om na vore te kom. Indien iemand na ‘n vermiste familielid soek, moet by die naaste polisiestasie aangemeld word.
Die publiek word herinner daar hoef nie tyd te verloop alvorens iemand as vermis aangemeld kan word nie. Speur. sers. Vusi Nkosi kan met inligting by 071 374 7759 of 082 798 0396 gebel word.
