WES-KAAP. – Die liggaam van die 3-jarige seun wat as vermis aangemeld is, is Vrydagaand in ‘n rietbedekte vleiland naby die park by die ingang na New Horizon en Qolweni gevind.
Bitou-munisipaliteit het in ‘n verklaring sy innige meegevoel met die kleuter se familie en geliefdes uitgespreek en sy dank uitgespreek teenoor Bitou-wetstoepassing, die polisiedienste, nooddienste en alle ander rolspelers wat aan die soektog en bergingsoperasie deelgeneem het.
Die munisipaliteit het die publiek versoek om die familie se privaatheid gedurende hierdie moeilike tyd te respekteer. Mense word ook aangemoedig om nie ontstellende foto’s of onbevestigde inligting op sosiale media te versprei nie.
