WES-KAAP. – Die liggaam van Felicia Micheals (15), ook as Blommie bekend, is op 1 Februarie in ‘n vlak graf ontdek nadat sy op 26 Januarie haar huis verlaat het en nie weer gesien is nie. ‘n Verdagte is gearresteer.
Sers. Christopher Spies sê die meisie is by haar huis in Brandwag, Mosselbaai, weg om ‘n vriend te besoek en het nie teruggekeer nie. Nadat sy as vermis aangemeld is, is ‘n soektog geloods wat die polisie na ‘n huis in Abrahamstraat in Brandwag gelei het. Tydens ‘n verdere soektog is haar liggaam in ‘n vlak graf in bosse naby Brandwag gekry. Forensiese misdaadtoneeldeskundiges het die toneel vir leidrade gefynkam.
Mosselbaai-GKS, wat die arrestasie uitgevoer het, ondersoek die omstandighede en motief van Micheals se dood.
Spies sê ‘n nadoodse ondersoek sal in die week gedoen word om die oorsaak van dood vas te stel. Die verdagte sal Dinsdag op ‘n aanklag van moord in die Mosselbaai-landdroshof verskyn.
