MPUMALANGA. – John Mauku (30) het homself, sy lewensmaat (28) en ‘n 2-jarige kind Donderdag in Lebohang met petrol deurdrenk en aan die brand gesteek. Die Leslie-polisie het ‘n saak van poging tot moord en ‘n geregtelike doodsondersoek geopen.
Lt.kol. Jabu Ndubane, polisiewoordvoerder, sê in ‘n verklaring aan Nuusflits volgens voorlopige inligting het die man en vrou ‘n rusie oor beweerde ontrouheid gehad. Die vrou het die kind ten tyde van die voorval vasgehou. Hulle het daarin geslaag om te ontsnap en het hulp by familielede gaan soek. Nooddienste is ontbied en al drie is na ‘n hospitaal geneem. Weens die erns van haar beserings is die 2-jarige na ’n gespesialiseerde mediese fasiliteit oorgeplaas. Die man is by aankoms in die hospitaal dood verklaar.
Die vrou en kind bly in die hospitaal terwyl die ondersoek voortduur.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
