MPUMALANGA. – Drie polisiebeampes, tussen 32 en 35, is Maandag in verband met die dood van ’n 33-jarige man ná ’n motorongeluk in Embalenhle op 17 Augustus, in hegtenis geneem.
Brig. Donald Mdhluli, polisiewoordvoerder, sê in ‘n verklaring die beamptes word deur aanklagte van moord en regsverydeling in die gesig gestaar. Dit volg nadat bewerings na vore gekom het dat die man ná die botsing aangerand is, wat moontlik tot sy dood kon bygedra het.
Die drie verdagtes het vandag (Dinsdag) in die Evander-landdroshof verskyn.
Genl.maj. Zeph Mkhwanazi, provinsiale polisiekommissaris, het beklemtoon dat die polisie se verbintenis tot integriteit en aanspreeklikheid standvastig bly. “Hierdie inhegtenisneming demonstreer ons verbintenis om die naam van die polisie te verdedig. Niemand is bo die wet nie, en die gemeenskap kan gerus wees dat die reg sy loop sal neem.”
