KWAZULU-NATAL. – ‘n Man (37) het Dinsdag gesterf toe sy motor van die Umzinto-brug op die N2 gery en in die rivier beland het.
Samantha Meyrick van IPSS Medical Rescue sê dié diens is na ‘n toneel waar ‘n voertuig oor ‘n brug gestort het.
“Met paramedici se aankoms is vasgestel die bestuurder van ‘n ligte motorvoertuig het beheer verloor, van die brug af gery en onder in die rivier beland het.”
Meyrick sê die man het noodlottige beserings opgedoen en is op die toneel dood verklaar.
“Paramedici en vrywilligers van IPSS Search and Rescue het die SAPD se soek-enreddingspan bygestaan om die man se liggaam uit te haal en aan die SAPD te oorhandig. Ons betuig meegevoel met die vriende en familie van die oorledene.”
