KWAZULU-NATAL. – ‘n Man is vroegoggend (Donderdag) op ‘n beweerde huisrooftoneel in Silverglenrylaan in Chatsworth, suid van Durban, doodgeskiet. Nog ‘n man is in ‘n kritieke toestand aangetref.
Garrith Jamieson van ALS Paramedics sê die polisie was met paramedici se aankoms op die toneel reeds teenwoordig. Twee persone met skietwonde is aangetref. ‘n Man, vermoedelik in sy 40’s, het ‘n noodlottige skietwond in sy bors opgedoen en is dood verklaar. Nog ‘n man, vermoedelik in sy 60’s, in ‘n kritieke toestand met ‘n skietwond in sy onderlyf, is deur gevorderde lewensondersteunende paramedici gestabiliseer voordat hy na ‘n hospitaal gehaas is.
Die omstandighede wat tot die skietery gelei het, is onduidelik. Die polisie ondersoek die insident.
