NOORDWES. – ’n Man (26) is vanoggend vroeg (Vrydag) op aanklagte van moord op Kgaugelo Marota (20), sy gewese meisie, en poging tot moord op sy huidige vriendin in Carousel View, naby Maubane, in hegtenis geneem. Die verdagte het glo die redes vir sy dade op sosiale media geplaas.
Kol. Adéle Myburgh, polisiewoordvoerder, sê in ‘n verklaring Marota se liggaam is Donderdag by ’n taverne in Maubane gevind. Sy het veelvuldige steekwonde gehad en is op die toneel dood verklaar. Ná die voorval het die verdagte glo na sy huis teruggekeer waar hy sy huidige vriendin verskeie kere met ‘n skerp voorwerp gesteek het. Sy is vir mediese behandeling na ’n plaaslike hospitaal geneem.
Die verdagte sal na verwagting Maandag in die Temba-landdroshof verskyn.
