GAUTENG. – ‘n Man (41) wat homself glo as ‘n staatsveiligheidsagent (SSA) voorgedoen het en by ’n woongebied in Silverlake opgetree het, is Woensdag in hegtenis geneem.
Volgens kol. Katlego Mogale, Valke-woordvoerder, het lede inligting ontvang oor die verdagte wat homself voordoen as ‘n staatsveiligheidsagent en glo ook vuurwapens in sy besit het. Boonop het hy glo sake-eienaars in die Pretoria-omgewing gedreig en afgepers. ’n Deursoekings- en beslagleggingslasbrief is bekom en uitgevoer, waarna twee SSA-verwante aanstellingskaarte tydens die operasie gevind is. Verdere ondersoek het ook bewerings van afpersing aan die lig gebring.
Die ondersoek duur voort en die verdagte sal na verwagting binnekort, sodra hy formeel aangekla is, in die hof verskyn.
