GAUTENG. – Brazea Daniel Mogudi (25) het Donderdag op twee aanklagte van moord in die Vereeniging-landdroshof verskyn, nadat hy na bewering Dikeledi Mogudi (54), sy ma, en Ntathile Mogudi (16), sy broer, doodgemaak het. Die saak is vir konsultasie met sy prokureur tot 12 Mei uitgestel.
Lumka Mahanjana, woordvoerder vir die NVG, sê volgens bewerings het ‘n buurman op 4 Mei omstreeks 19:00 ’n rumoer by die Mogudi-huis in Henley on Klip gehoor. Hy het ondersoek ingestel en het die beskuldigde bo-op sy jonger broer aangetref, wat op die grond gelê het. Die beskuldigde se ma was naby en het hulpeloos geskree en uitgeroep: “Hy maak hom dood!”
Hulp is van die gemeenskap ontbied en alhoewel hulle reageer het, kon hulle nie die eiendom binnegaan nie, omdat die hek gesluit was. Die polisie, die gemeenskapspolisiëringsforum (GPF) en nooddienste is na die toneel ontbied, maar beide slagoffers is by aankoms dood verklaar.
Teen die tyd dat hulp opgedaag het, het die beskuldigde reeds van die toneel gevlug. Hy het homself glo kort ná die insident by die Meyerton-polisiekantoor oorgegee, waar hy in hegtenis geneem is.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
