MPUMALANGA. – Frederick Jakobus Botha (62) het vandag (Woensdag) op aanklag van die besit van meer as 13 ongelisensieerde vuurwapens en ammunisie in die Hoof Albert Luthuli-landdroshof verskyn.
Luidens ‘n verklaring van lt.kol. Jabu Ndubane het die polisie Dinsdag tydens ‘n intelligensie-gedrewe operasie op ‘n plaas in Carolina op meer as 13 vuurwapens wat selfvervaardigde wapens, gewere, ‘n haelgeweer en handwapens insluit, beslag gelê. Botha kon glo nie ’n bevredigende verduideliking vir die besit daarvan gee nie.
Die polisie het op op drie selfvervaardigde vuurwapens, vier gewere, een haelgeweer, vyf handwapens en ses windbukse, asook ‘n totaal van 1 080 rondtes van verskeie kalibers en 106 blanks (oefendrondtes) beslag gelê.
Die saak is vir ‘n borgtogaansoek tot 19 Januarie uitgestel, terwyl Botha in aanhouding bly.
