‘n Man wat in ‘n TikTok-video van @Lethabo_Sebapo bier in ‘n vis se mond gooi, kan hieroor in die pekel beland.
Die Nasionale Raad van Dierebeskermingsverenigings (NDBV) sê kriminele aanklagte sal gemaak word teen die individu wat in die video, wat wyd op sosiale media versprei word, verskyn. In die video kan gesien word hoe “bier” in die mond van ‘n karp gegooi word, terwyl dit deur die individu amusant gevind word. Die persoon in die video is intussen opgespoor en die samestelling van ‘n dossier is feitlik voltooi.
Die persoon het aan die dierebeskermingsvereniging erken pret was die motivering vir die video. Hy word nou deur die aanklag van die oortreding van die dierebeskermingswet in die gesig gestaar.
Die dierebeskermingsvereniging bevestig sosialemediaplatforms het ‘n toename in video’s waartydens diere mishandel word, meegebring. Die organisasie hoop ‘n sterk boodskap sal aan individue gestuur word om nie diere te mishandel nie.
