MPUMALANGA. – Gideon Kotze, ‘n matrikulant van Hoërskool Hoogenhout in Bethal, het gewys ondanks erge brandwonde kon hy steeds met sy matriekeksamen deurdruk.
Hoërskool Hoogenhout het Gideon in ‘n sosialemediaplasing as moedig bestempel en die omstandighede hoe hy sy brandwonde opgedoen het, gedeel.
Volgens die skool het ‘n veldbrand naby Gideon se huis uitgebreek en hy het gery om die vlamme te help blus, die wind het gedraai en die bakkie het gestol. Gideon moes noodgedwonge deur die vlamme hardloop en het eerste- en tweedegraadse wonde aan sy gesig, arms, bene en voete opgedoen.
Die ongeluk het hom vroeg in die eksamen getref, maar hy het ondanks pyn en ongemak steeds sy matriekeindeksamen geskryf.
“Ons bewonder sy moed en deursettingsvermoë en is saam met Gideon dankbaar dat hy wel in staat was om hierdie belangrike eksamen te voltooi en dat hy reeds goed herstel het. Die Hoogies is trots op jou, Gideon!”
Cindy Kotze, Gideon se ma, het op sosiale media gesê hoe trots sy op haar seun is.
