GAUTENG. – Meer as 293 000 leerlinge wat vir plek in gr.1 en gr. 8 by skole in die provinsie aansoek gedoen het, het aanbiedinge van die onderwysdepartement ontvang.
Steve Mabona, woordvoerder vir onderwys in die provinsie, sê die aanbiedinge -146 385 vir gr. 1 en 146 672 vir gr. 8 – is vanaf Donderdagoggend om 07:00 uitgereik.
“Dit volg ná die begin van die 2025- aanlyn toelatingsplasingstydperk vir graad 1- en graad 8-leerders. Tot op hede is 148 744 aanbiedinge aanvaar, terwyl sowat 105 193 aanbiedinge nog deur ouers aanvaar moet word.”
Die aanbiedinge word in groepe uitgestuur en ouers word deur die departement herinner die proses gaan nog tot die einde van die jaar voortduur.
Mabona sê ouers wat ‘n aanbod kry, moet dit binne sewe dae na ontvangs aanvaar op die webtuiste www.admissions.gov.za. Ná aanvaarding word die kind by die skool geplaas en daar is nie kans om dit te verander nie. Andersins kan die aanbod voorlopig aanvaar word, terwyl daar op ander aanbiedinge gewag word.
“Die aanvaarding van ‘n aanbod hou die kind in die plasingsproses terwyl daar op verdere aanbiedinge gewag word. Indien ‘n nuwe aanbod aanvaar word, sal die vorige een gekanselleer word. Indien geen verdere aanbiedings binne sewe dae gemaak word nie, word die laaste aanvaarde aanbod finaal.”
Die aanbiedinge sal gemaak word totdat alle leerlinge geplaas is.
“Ouers wat nie dadelik ‘n SMS ontvang nie, moenie paniekerig raak nie, aangesien hulle by die GDE-webwerf kan aanmeld om te kyk vir plasingsopdaterings. Indien ‘n SMS ‘n kind se plasing by ‘n spesifieke skool bevestig, word geen verdere optrede van die ouer vereis nie. Alle plasings is onderhewig aan die beskikbaarheid van spasie en die prioriteitsplasingskriteria. Indien ‘n skool kapasiteit bereik en nie ‘n leerder kan akkommodeer nie, kan ouers ‘n oorplasingsaanbod ontvang vir die volgende naaste skool met beskikbare spasie. Ouers kan kies om oordragaanbiedinge te aanvaar of te weier.”
Mabona sê indien ‘n aansoek as “Application still being processed” gemerk is, beteken dit die ouers sal nog ‘n aanbod kry.
“Ons het ook kennis geneem van kommer van ouers wie se aansoekstatus verander het van “Documents Verified” na “No Documents Submitted.” Hierdie verandering is die resultaat van ‘n noukeurige hersieningsproses waar ingediende dokumente gekontroleer is vir egtheid, leesbaarheid en volledigheid.”
Mabona sê plasingskriteria is die huisadres wat naaste aan die skool se area is, broers en susters se bywoning of vorige inskrywings by die skool en ‘n ouer se werksadres binne die skool se area.
“Aansoeke wat as “No Documents Submitted” gemerk is, sal slegs oorweeg word vir plasing gedurende die laatregistrasietydperk vanaf 11 Desember 2024.”
Indien ouers nie met ‘n aanbieding tevrede is nie, kan beswaar binne sewe dae op ‘n aanlyn vorm gemaak word. Dit sal heroorweeg word en die uitkoms sal binne 14 dae gegee word. Indien ‘n ouer dan nog steeds ontevrede is, kan appèl binne sewe dae aan die LUR gerig word en die uitslag daarvan sal binne 14 tot 21 dae gegee word.
“Appèlle is finaal en bindend.”
“Indien ouers bystand of verduideliking benodig rakende hul aansoek of plasingstatus, kan hulle die GDE se Kontaksentrum kontak by 0800 000 789 of via WhatsApp by 060 891 0361. Daarbenewens kan ouers enige van die 15 distrikskantore besoek vir verdere ondersteuning.”
“Ons bly daartoe verbind om alle leerders regverdig te plaas. Ons bedank ouers vir hul geduld en samewerking terwyl ons ywerig werk om plasings vir leerders in Gautengse openbare skole te verseker,” sê Matome Chilane, die LUR vir onderwys in die provinsie.
