GAUTENG. – Barbara Creecy, die minister van vervoer, en Mkhuleko Hlengwa, die adjunkminister, het ernstige kommer uitgespreek oor die toename in padsterftes waar openbare vervoer betrokke is. Altesaam 41 mense was Saterdag op die N8 in ‘n ongeluk betrokke, van wie 10 gesterf het.
Collen Msibi, woordvoerder vir die departement, sê die voorval het plaasgevind toe ’n trok en ’n Interstate-bus sowat 5 km van Mandela View tussen Bloemfontein en Botshabelo gebots het. Die bus het glo werkers na Bloemfontein vervoer. Nooddienste het bevestig dat ses mense ernstige en kritieke beserings opgedoen het en na die Pelonomi-trauma-eenheid geneem is. Sewe ander is met matige beserings na die Botshabelo-hospitaal en Busamed geneem. Nog 24 mense het geringe beserings opgedoen en is na Botshabelo-hospitaal vervoer. Een persoon het verkies om nie hospitaal toe te gaan nie.
Creecy en Hlengwa het die padverkeersbestuurskorporasie opdrag gegee om in samewerking met plaaslike owerhede die oorsaak van die ongeluk te ondersoek. ’n Voorlopige verslag word binne 48 uur ná die ondersoek begin het, verwag.
