KWAZULU-NATAL. – Minstens drie insittendes van ‘n volgelaaide minibustaxi het vanoggend (Dinsdag) gesterf toe dit op die R102 oor die Tongaat-rivierbrug naby Durban na benede gestort het.
Kelsey-Jae Meyrick van IPSS Medical Rescue sê dié diens is saam met verskeie ander dienste op die toneel, naby die Maidstone Sugar Mill, teenwoordig. Drie persone is reeds dood verklaar, 12 is ernstig beseer, van wie een nog deur die brandweer van die minibustaxi-wrak bevry word. Meyrick sê dit is onbekend hoeveel insittendes geringe beserings opgedoen het, aangesien hulle reeds die toneel verlaat het toe die nooddienste opgedaag het.
Die pad is gesluit en motoriste word gevra om ryvoorrang aan noodvoertuie te gee. Indien moontlik, moet ander roetes gebruik word.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
