LIMPOPO. – ’n Saak van moord en ’n poging tot moord word ondersoek ná ’n voorval Vrydag in Joubertstraat, Makhado, waartydens ’n man tydens inhegtenisneming doodgeskiet is. ‘n polisiebeampte is met ernstige beserings in die hospitaal opgeneem.
Luidens ‘n verklaring van brig. Hlulani Mashaba was polisiebeamptes met roetine-misdaadvoorkomingspligte besig toe hulle op die verdagte man afkom. Toe ’n beampte hom wou deursoek, het hy glo ’n mes uitgehaal, na die beampte beweeg, losgeruk en weggehardloop. Bystand is ontbied.
’n K9-eenheid het vinnig bystand verleen, waartydens die verdagte aangekeer is. Die man het glo hierop ’n leë bottel opgetel en ’n polisiebeampte in die bolyf gesteek. Waarskuwingskote is eers geskiet, waarna die verdagte noodlottig gewond is. Hy is deur nooddienste op die toneel dood verklaar.
Die identiteit van die oorledene is tans nog onbekend. Die onafhanklike polisie-ondersoekdirektoraat (Opod) is in kennis gestel om die saak te hanteer.
