GAUTENG. – Die saak teen Amukelani Musengi (40), ‘n beampte van die Johannesburgse metropolisie (JMPD), wat van die moord op ‘n kollega aangekla word, is Maandag in die Protea-landdroshof tot Woensdag 8 Julie uitgestel vir die verifiëring van haar woonadres.
Lizzy Suping, Opod-woordvoerder, sê volgens die staat het Musengi in die vroeë oggendure van 28 Junie by ‘n kuierplek in Glenridge-uitbreiding 16, Soweto, glo in ‘n rusie met ‘n vriendin betrokke geraak. Sy het na bewering haar JMPD-kollega ontbied om in die situasie in te gryp. Toe die kollega by die kuierplek aankom, het Musengi se vriendin glo in die kollega se voertuig geklim, waarna hulle van die toneel weggery het. Die staat beweer Musengi, wat in daardie stadium nie aan diens was nie, het verskeie skote met haar diensvuurwapen op die voertuig geskiet terwyl dit gery het. Haar kollega is noodlottig getref. Paramedici het die JMPD-beampte op die toneel dood verklaar.
Musengi is kort daarna in hegtenis geneem en staan tereg op ‘n aanklag van moord. Die saak sal Woensdag weer in die Protea-landdroshof voorkom.
