GAUTENG. – Vier verdagtes is Donderdag in hegtenis geneem in verband met ’n moord ná ’n gewelddadige voorval by ’n winkel in Meyerstraat, Wonderboom-Suid, Pretoria. Die slagoffer is bewusteloos langs ‘n rooi Corsa buite die winkel aangetref, waar hy dood verklaar is.
Kapt. Johan van Dyk sê polisiebeamptes is na Meyerstraat na ’n bakleiery by ’n supermark ontbied. Met hul aankoms het beamptes drie mans buite die winkel aangetref met bloed op hul gesigte, terwyl daar ook bloed in die winkel naby die toonbank gevind is. ’n Man is langs ’n rooi geparkeerde Corsa buite die winkel aangetref waar hy deur nooddienste dood verklaar is.
Misdaadtoneeldeskundiges het die toneel vir leidrade gefynkam. Ná aanvanklike ondersoekwerk is leidrade opgevolg wat tot die identifisering van vier verdagtes gelei het. Hulle is opgespoor en op aanklag van moord in hegtenis geneem. Die verdagtes het Dinsdag in die Pretoria-Sentraal-landdroshof verskyn.
Genl.maj. Samuel Thine, die distrikskommissaris van Tshwane, het die polisiebeamptes geprys vir hul vinnige optrede wat tot die inhegtenisnemings gelei het.
