Berigte oor motorongelukke is volop. Dit laat baie mense wonder wat hulle in so ’n situasie sou doen. Wees voorbereid en doen die volgende indien jy ooit in ’n motorongeluk betrokke is:
1. Wees kalm en som die situasie op
Al wil jou hart by jou borskas uitspring, bly kalm. Kyk of iemand beseer is en bel dadelik die nooddienste.
2. Bel die polisie
Selfs al lyk die ongeluk nie ernstig nie, is dit beter om die owerhede so gou as moontlik by die ongelukstoneel te kry.
3. Bly eers in jou voertuig
Moenie dadelik uit jou voertuig klim nie. Jy kan moontlike beserings vererger. Indien die pad besig is, is dit ook onveilig. Dit is natuurlik ’n ander storie as jou voertuig aan die brand is!
4. Maak die pad skoon
Indien dit ’n klein ongeluk was, laat die voertuie uit die pad beweeg. Dit sal verseker dat die verkeer nie ophoop nie. Moet egter nie bewysstukke van die ongeluk sommer net verwyder nie.
5. Versamel inligting
Kry alle betrokkenes se kontak-en versekeringsinligting. Neem ook self foto’s vanuit alle hoeke van jou motor en die skade. Teken die betrokke voertuie se registrasienommers aan. Indien daar ooggetuies is, kry hulle kontakbesonderhede.
Niks kan jou op ’n motorongeluk voorberei nie. Jy kan wel die gemoedsrus hê dat jy sal weet wat om na die tyd te doen.
Bronne: Progressive, Forbes, Investopedia
